హేమలంబ నామ సంవత్సర ఫన్‌చాంగం

హేమలంబ నామ సంవత్సర ఫన్‌చాంగం

                నచ్చితే నలుగురికీ చెప్పండి !  నచ్చకపోతే నాకు చెప్పండి !!                 ఫణి మాధవ్ కస్తూరి  

ఫేస్ బుక్ రాశి :

ఆదాయం :  ముఖం తెలీని ఫ్రెండ్లు                            వ్యయం  : విలువైన సమయం

రాజ పూజ్యం :  లైకులు                                   అవమానం :  ప్రొఫైల్ పిక్ కి వచ్చే కామెంట్లు

ఈ రాశివారికి 365 రోజుల్లో 50% సమయం వృధా. వేలాది మంది ఫ్రెండ్స్ ఉన్నా.. అందులో పరిచయం ఉన్నవారు, పనికొచ్చే వారు సున్నా. ప్రొఫైల్ పిక్ ఎవరో హీరోది/హీరోయిన్ ది ఉండడం వల్ల ఎంతో మంది ఆకర్షితులైనా..నిజం తెలుసుకుని వదిలి వెళ్లే వళ్ళే ఎక్కువ. లైకులు, కామెంట్లు మెసెంజర్ లో మెసేజులు.. సినిమాలు-రాజకీయాల గురించి చర్చలు తప్పవు. తెలీక తలదూరిస్తే, అవమానాలు తప్పవు.

వాట్సాప్ రాశి :

ఆదాయం : శూన్యం                                         వ్యయం  : డాటా చార్జీలు

రాజ పూజ్యం : రోజూ గుడ్డు మార్నింగు మెసేజిల్లో             అవమానం : గ్రూప్ లోంచి పీకేయడం

ఈ రాశి వారికి నిమిష నిమిషానికి మెసేజులు ఖాయం. ప్రతీ రోజు పదహారు గ్రూపుల్లో మనకు తెలీకుండానే జాయిన్ అవడం, వందలాది గుడ్డు మార్నింగు మెసేజీలు, వీడియోలు, జోకులు, కాపీ పేస్టు కధలు.. రాజకీయ చర్చలు. పనికొచ్చేవి లేకపోయినా. పని చెడగొట్టడానికి చాలా శీర్షికలు. బ్లూటిక్కుల వల్ల చిక్కులు. అడ్డమైన ఫొటోలు, వీడియోల వల్ల మీకు, మీ ఫోనుకు మెమరీ లాసు.

మొబైల్ ఫోన్ రాశి :

ఆదాయం :  ఇన్ కమింగు                       వ్యయం  : అవుట్ గోయింగ్

రాజ పూజ్యం :  కస్టమర్ కేర్ కాల్స్ లో        అవమానం : ఆఫీసు, హౌస్ బాస్ ల కాల్స్ తో

ఈ రాశి వారికి ఫోన్ మోడల్స్ తోనే అవమానం ప్రారంభం. ఇవాళ కొన్నదాని కన్నా కొంచెం ఎక్కువ ఫీచర్లతో మరో మోడల్ రేపే విడుదలయ్యే అవకాశం. కెమెరా, ఫోన్ స్పీడు, ఇతర ఫీచర్లన్ని బాగుంటే సిగ్నల్ ప్రాబ్లెం అదీ బాగుంటే బాటరీ డవున్ అయ్యే సూచనలు ఉన్నాయి. డ్రైవింగ్ చేస్తూ మొబైల్ మాట్లాడే వాళ్లకి ప్రాణాపాయం లేదా భారీ ప్రమాదాలు సూచిస్తున్నాయి. వాట్సాపులున్నవారు ఫోన్ ఇంట్లో వాళ్ళకు కనిపించినచో విపత్కర పరిస్థితుల్లో ఇరుక్కోవచ్చు. గరల్ ఫ్రెండ్స్ కోసం మీదగ్గరకన్న మంచి మోడల్ కొనిపెట్టడం వల్ల ఆర్ధికంగా నష్టం.

జియో కస్టమర్స్ :

ఆదాయం : మార్చి 31 వరకు ఉచితం           వ్యయం  : నెల నెలా బాదుడు

రాజ పూజ్యం : అంబానీకి                    అవమానం : సిగ్నల్ దొరకని నీకు

ఈ మధ్యే కనుగొన్న ఈగ్రహం వల్ల, ఇతర మొబైల్ కంపెనీలకు గ్రహణం పట్టుకున్న సూచనలున్నా.. అది కస్టమర్లకు లాభమే తెచ్చింది. వోల్ట్ మీద ఆధారపడ్డం వల్ల ప్రారంభంలో ఇబ్బందులు తప్పవు. మార్చి 31 వరకు గ్రహ స్థితి బాగానే ఉన్నా.. ఏప్రిల్ 1 నుండి ఉచిత మిత్రులను కోల్పోయే అవకాశం.

ఈ ఫన్‌చాంగం కేవలం సరదాగా నవ్వుకోడానికి రాసిన వ్యంగ్య గల్పిక మాత్రమే. ఎవరినీ ఇబ్బంది పెట్టడానికి కాదు. 

అందరికీ శ్రీ హేమలంబ నామ సంవత్సర ఉగాది శుభాకాంక్షలు.

నచ్చితే నలుగురికీ చెప్పండి! నచ్చకపోతే నాకు చెప్పండి...!!

ఫన్చాంగ శ్రవణం

                 ఫన్చాంగ శ్రవణం

 

 శ్రీ గురుభ్యోనమ:

కేవలం ప్రతీ రోజూ మారిపోతున్న రాజకీయ సమీకరణాల వల్ల అస్తవ్యస్తమౌతున్న ప్రజా జీవితానికి రిలీఫ్ కోసం సరదాకి వ్రాసిన శీర్షిక, భవిష్యత్తు తెలిపే పంచాంగాన్ని అగౌరవ పరచడం ఏమాత్రం కాదు. ఇందులోని వ్యంగ్యాన్ని ఆస్వాదించి..అశీర్వదిస్తారని ఆశిస్తూ వికృతి నామ సంవత్సర ఫలితములు...రాజకీయ సామాజిక ఫంచాంగ శ్రవణము


ముఖ్య మంత్రి రోశయ్య
సోనియా శుభదృష్టి వల్ల ముఖ్యమంత్రి పదవి దక్కినా...ఏడో ఇంట్లో ఉన్న కేసీ ఆర్ వల్ల నిత్యం సమస్యల తో తలనొప్పిగా ఉంటుంది...కొన్ని ఇతర కారణాల వల్ల ఇంటి పోరూ తప్పదు.."శ్రీ కృష్ణ "జపం..తో పాటు ప్రణబ్ మంత్రం...చిదంబర దర్శనం, సోనియాలయం పర్యటన, చేస్తూ ఉంటే ఫలితం ఉండవచ్చు..


రాజపూజ్యం : రాజ యోగం
అవమానం: గాంధీ భవనం
ఆదాయం: అనుభవం
వ్యయం: అనారోగ్యం


చంద్రబాబు నాయుడు
హైటెక్ పూజలు చేసి...పల్లె మాతను పట్టించుకోకపోవడం వల్ల కోల్పోయిన రాజ్యం. తెలంగాణా నాయకుల వక్ర దృష్టి వల్ల మరింత నష్టం... మూడో ఇంట బాలయ్య, ఐదో ఇంట ఎన్ టీ ఆర్ ఉండటం వల్ల కొంత వరకూ లాభమే అయినా ప్రస్తుతం..జే ఏ సీ వెంట కొందరు నాయకులుండడం వల్ల రోశయ్య లాగానే ఇంటి గండం ఎదుర్కునే అవకాశం..
సమ్మక్క సారలమ్మలను మొక్కుకుని..యాగం చేసి నాగం ముక్కుకు తాడెయ్యకపోతే మరింత నష్టం వాటిల్లే ప్రమాదం.


రాజపూజ్యం : ఎన్ టీ ఆర్ ట్రస్ట్ భవనం
ఆందోళనం: తెలంగాణా నాయకుల శిబిరం
ఆదాయం : బాలయ్య తో వియ్యం
వ్యయం: తెలంగాణా విషయంలో కయ్యం


చిరంజీవి
సినీ మతం నుంచి, రాజకీయం వైపు మతం మార్చుకోవడం వల్ల, ప్రేక్షక దేవుళ్లు కరుణించినట్లుగా .ఓటరు దేవుళ్ళు పట్టించుకోకపోవడం వల్ల కొంత గందరగోళ పరిస్థితుల్లో ఉన్నారు..."గురువు"(అల్లు ) బలహీనమవడం వల్ల "మిత్ర " బేధాలు, "పూర్వ " జన్మ పుణ్యం వల్ల "సంతానం " లో మగధీరుల వల్ల లాభం,


రాజపూజ్యం : ప్రేక్షక హృదయాల్లో
అవమానం: అసెంబ్లీ ఎన్నికల్లో
ఆదాయం: మగధీర వసూళ్ళు
వ్యయం : రాజకీయ సవాళ్ళు

కే సీ ఆర్
తెలంగాణా తల్లి విగ్రహ ప్రతిస్టాపన వల్ల కొంత మంచి జరిగినా., వాస్తవ దోషాల వల్ల కొన్ని అపశృతులు,
(ని)గ్రహ దోషాల వల్ల ఆహార లోపం కలిగినా అదీ లాభదాయకమే. (నిరాహార దీక్ష)
ఇతర గ్రహాలన్ని కలిసి జే ఏసీ కూటమి గా మారడం వల్ల కూడా కొన్ని లాభాలు కలుగ వచ్చు, కానీ విద్యార్ధుల్లో ఆవేశాలు.ప్రాణ నష్టం ,"ఖాకీ"ల పట్ల జాగ్రత్తతో వ్యవహరించాలి, లగడపాటి లాంటి వాళ్ళతో చిన్న చిన్న చికాకులు.


రాజ పూజ్యం: NIMS లో నిరాహార దీక్షా శిబిరం
అవమానం: ఢిల్లీలో కేంద్ర కమిటీ వ్యవహారం
ఆదాయం: జే ఏ సీ సపోర్టు
వ్యయం: శ్రీకృష్ణ కమిటీ రిపోర్టు

 http://sujanaranjani.siliconandhra.org

నచ్చితే నలుగురికీ చెప్పండి..నచ్చకపోతే నాకు చెప్పండి